මුල්‍ය වංචාවෙන් ගෑස් සභාපතිට ලැබුන මුදලින් කොටසක් ආණ්ඩුවේ පිරිසකට

මා ළඟ තියෙන්නේ ලක්ෂ 20ක් විතරයි. - ශලීල මුණසිංහ කියයි
තායිවානයේ ඊස්ටර්න් ඉන්ටර්නැශනල් බැංකුවේ පරිඝනක පද්ධතියට නීත්‍යානුකූල නොවන අන්දමට ඇතුළුවී (හැක් කර) මුදල් වංචා කිරීමේ සිද්ධියේදී ලිට්රෝ සභාපතිට ලැබුන මුදලින් කොටසක් රජයේ ප්‍රබලයින් කිහිප දෙනෙකුට බෙදාදී ඇති බවට සැකයක් මතුවී ඇතැයි පොලිසියේ ජ්‍යෙෂ්ඨ නිලධාරියකු  පැවසිය.

මෙම ගනුදෙනුවෙන් ලැබුණු මුදලින් තමා ළඟ ඇත්තේ රුපියල් ලක්ෂ විස්සක් පමණක් බව ලිට්රෝ ගෑස් සමාගමේ සභාපති ශලීල මුණසිංහ මහතා රහස් පොලීසියට ප්‍රකාශ කර තිබීම මෙම සැකයට හේතුවී තිබේ.

එහෙත් ශලීල මුණසිංහ සම්බන්ධ මුදල් ගනුදෙනුවේදී ලංකා බැංකුවෙන් ලබාගෙන ඇති මුදල රුපියල් ලක්ෂ 300කි.

එම මුදල ලංකා බැංකු ශාඛාවකින් ලබාගෙන රැගෙන යන ආකාරය දැක්වෙන සීසීටීවී කැමරා දර්ශන ද රහස් පොලීසිය සතුව ඇති අතර ඉතිරි ලක්ෂ 280ට සිදු කළේ කුමක්ද යන්න ගැටළුවක් වී තිබේ.

රාජ්‍ය නොවන සංවිධානය ?

මෙම රුපියල් මිලියන 30ක මුදල ලැබී ඇත්තේ ලංකාව පුරා ඉංග්‍රීසි භාෂා උපකාරක පන්ති පවත්වන රාජ්‍ය නොවන සංවිධානයකට අයත් බැංකු ගිණුමකටය.

මෙම මූල්‍ය අපරාධයට සම්බන්ධ විශාල පුද්ගලයින් ජාලයක් පිළිබඳව ම තොරතුරු දැනට හෙළිදරව් වී ඇති අතර තරාතිරම නොබලා පුද්ගලයින්ව අත් අඩංගුවට ගන්නා ලෙස ජනාධිපති මෛත්‍රීපාල සිරිසේන මහතා විසින් ද රහස් පොලීසියට නියෝග කර තිබේ.

තායිවාන බැංකුවේ සිදු වූ සමස්ථ මුදල් වංචාවෙන් ලංකාවට එවා ඇති මුළු මුදල රුපියල් මිලියන 200කි.

එම මුදල් ලැබුණු සියළුම ගිණුම් වල තොරතුරු මේ වන විට අනාවරණය වී ඇති අතර විමර්ශන තවදුරටත් ක්‍රියාත්මකය.

මෙම මහා පරිමාණ මූල්‍ය වංචාව සම්බන්ධයෙන් ලිට්‌රෝ ගෑස්‌ සමාගමේ සභාපතිවරයා සහ හිටපු ජ්‍යෙෂ්ඨ හමුදා නිලධාරියකුගේ පුත්‍රයෙක්‌ අපරාධ පරීක්‍ෂණ දෙපාර්තමේන්තුව මගින් අත්අඩංගුවට ගෙන සිටිති.

මෙම සිද්ධියට සම්බන්ධ ශ්‍රී ලංකාවේ රැඳී සිටි ඉන්දීය ජාතිකයන් දෙදෙනකු මීට දින කීපයකට පෙර හොර රහසේම රටින් පලාගොස්‌ ඇති බව රහස් පොලිසිය කළ විමර්ශනවලින් හෙළි වී ඇත.
© Copyright (2012) * Lanka Hot News* All Rights Reserved.